Бөлүмдөр
Шейшемби, 20-август
Жалал-Абад облусуБазар-Коргон району 15.10.2015 15:00

Базар-Коргон районунда быйыл жаңы 10 ишкана ишке киргизилди, - аким Т.Долдоев (фото)

Turmush -  Базар-Коргон районунда алды 50 адамды, арты 15 адамды жумуш менен камсыз кылган 10 ишкана ачылды. Бул тууралуу райондун акими Таалайбек Долдоев билдирди.

Жаңы ачылган ишканалардын бири катары Базар-Коргон районундагы «Cotton Textile Factory» пахта заводунда ачылган май цехин атоого болот.

Аталган заводдун директору Майрамбек Турдуевдин сөзүнө караганда, өткөн жылы завод май цехин куруп, быйыл ал ишке берилди. Бул цехте 12 адам жумуш менен камсыз болгон. Пахтанын чигитинен май чыгарып, анын калдыгынан кир самын жасап, дыйкандарга берип жатышат. Майдын 1 литри 80 сом, самындын бир даанасы 15 сомдон дыйкандарга сатылат.

«Пахта завод 2013-жылы ачылган. Жергиликтүү салыктан соцфондго жана жеке киреше салыкты товардын сатылышына жараша төлөйбүз. Өткөн жылы 1 млн сомго жакын салык төксөк, быйылкы жылы мындан да көбүрөөк төгүлүшү күтүүлүүдө. Учурда завод 4 миң тонна пахтаны кабыл алат. Бирок, заводдун 20 миң тоннага чейин пахтаны иштеткенге мүмкүнчүлүгү бар. Учурда заводдо 80-100гө жакын киши иштейт. Заводдо иштелип чыккан пахта буласы Түркия менен Россияга экспорттолуп жатат. Дыйкандар менен алдын ала келишим түзүп, пахтанын киллограммын 40 сомдон алып жатабыз. Биз банктан 12 пайыз менен насыя алып, аны дыйкандарга жазында пайызы жок беребиз. Башкаларга караганда, биздин ишкана пахтаны 5 сомго кымбат алып жатат. Жазында дыйкандарга селитраны Казакстандан алып келип беребиз», - деди М.Турдиев.

Жакында премьер-министр Темир Сариев да Жалал-Абад облусуна жасаган иш сапарынын алкагында аталган пахта заводдун иши менен таанышып чыгып, жер-жерлердеги мындай заводдордун ишке киришинин мааниси чоң экенин белгиледи. Ош, Жалал-Абад аймактарында пахта талааларын көбөйтүү керектигин билдирип, бул үчүн пахтаны кайра иштетүүгө керектүү шарттарды түзүү зарыл экендигин баса белгилеп кетти.

«Мындай ишканаларга мамлекеттик колдоону жогорулатуу боюнча бардык аракеттер көрүлүп жатат. Пахта заводго банк аркылуу жеңилдетилген насыя берип, дыйкандар заводдон пайызы жок насыяларды алышы керек. Ошонун негизинде пахта талааларын көбөйтүү зарыл», - деди Т.Сариев.

Ошондой эле, мындай ыкманы бардык аймактарга жайылтуу зарылдыгын белгилеген премьер-министр аны каржылоо максатында Кыргыз-Орус өнүктүрүү фондунан атайын долбоордун негизинде каражат алууну «Cotton Textile Factory» пахта заводунун директору М.Турдиевге сунуштады. Заводдон өндүрүлгөн пахтанын негизинде кездеме чыгаруу өндүрүшүн жолго коюну өкмөт башчы өз сөзүндө билдирди.

Пахтаны наркы төмөн болгондуктан, дыйкандардын көпчүлүгү пахта аянтарынын ордуна жашылча өстүрүүгө өтүп кетип жаткандыгын адистер тынчсыздануу менен айтышты.

«Эгерде, пахта өстүргөн дыйкандарга пайызы жок насыялар берилсе, анда алардын эмгегинин акыбети кайтып, алар пахта эгүүгө көбүрөөк кызыга башташат», - дейт Базар-Коргон районунун акиминин 1-орун басары К.Тилекеев.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×