Бөлүмдөр
Шаршемби, 26-июнь
Жалал-Абад облусуБазар-Коргон району 17.05.2019 17:40 На русском

12 жылдык күтүү: Сейрек ооруга чалдыккан 2 жаштагы Татына Айым Индиядан айыкты

Татына Айым ата-энеси менен Индияда
Татына Айым ата-энеси менен Индияда

Turmush -  Сөөктүн аплазия оорусу менен жабыркаган 2 жаштагы Татынай Айым Индия өлкөсүнөн дарыланып келди. Бул тууралуу кайрымдуулук фонддун жетекчиси Медер Сапарбаев билдирди.

М.Сапарбаевдин айтымында, Татына Айым менен бирге кыргызстандык дагы эки бейтап Индиядан дарыланып келишти.

«9-май күнү Индиядан кыргызстандык 3 бейтап дарыланып, мекенине кайтып келишти. Алар — боорун операция жолу менен алмаштырган Эламан аттуу жигит, сөөк, омуртка-муун оорусу менен жабыркаган Мирлан аттуу жигит жана 2 жаштагы Татына Айым. Бейтаптар менен Индияга чогуу барып, кайра чогуу келдим. Татына Айым буюрса толугу менен жакшы болуп кайтты. Индиядагы дарыгерлер дагы 15 жыл бою дарыгерлердин көзөмөлүндө болсо, биротоло жакшы болуп кетээрин айтышты», - деди Медер Сапарбаев.

Татына Айымдын апасы Зулфия Айдарованын айтымында, индиялык дарыгер Оштон дарылаган дарыгер эмне үчүн дары-дармек жана витаминдерди жазып бербей жүргөнүнө таң калган.

«Биз ушул жылдын 17-февралында Индия өлкөсүнө кызыма операция жасатуу үчүн учуп кеткенбиз. Ош облустук балдар ооруканасынан кызыма “сөөктүн аплазиясы” деген диагноз коюшкан. Бирок Индиядагы дарыгерлер “Кыргызстанда чыгарылган диагноз менен кызыңарды дарылай албайбыз, биз өзүбүз анализ алып, кайра текшеришибиз керек” дешти. Анализдердин жыйынтыгы чыккан соң “кызыл клеткалуу аплазия” деген диагноз коюлду. “Бул кызга операция кылуунун кереги жок, көтөрө албай калышы мүмкүн. Бир гана кандагы эритроциттер иштебейт экен” деди дарыгер. Дары-дармектер менен дарылап башташты. “Бир айга чейин дарынын таасири билинет” деген, айткандай эле бир жумада кызымдын каны көтөрүлдү. Буга чейин кызымдын каны көтөрүлчү эмес, улам түшүп кеткендиктен, кан куюп турчубуз. Ошто медайымдар түшкү саат он экиден төрткө чейин кызымдын тамырын таппай кыйналышчу. Индияда лабораторияда иштеген дарыгерлер кызымдын тамырын ийнени бир сайганда эле таап жатышты. Дары-дармектерди биз жашаган үйгө өздөрү жеткирип беришет экен. Дарыланууга жалпысынан 15 миң доллардан ашык акча сарптадык. 2020-жылдын январь айында кайра Индияга барып, текшерүүдөн өтөбүз. 15 жашына чейин дарыгердин көзөмөлүндө болот. Андан кийин “толугу менен айыгып кетет” деп ишендиришти», - дейт Зулфия Айдарова.

Ал кызынын дарылануусуна акчалай жардам берген жалпы кыргыз элине ыраазычылыгын билдирди.

Сөөктүн аплазиясы кан системасынын оорусу болуп саналат. Бул ооруда кандагы клетканын бардык түрлөрү: лейкоцит, тромбоцит, эритроциттер иштелип чыкпай калат (панцитопения).

Кызыл клеткалуу аплазия — канда эритроциттердин (ткандарды кычкылтек менен камсыздаган клетка) жетишсиздиги.

Буга чейин Turmush басылмасы 2018-жылдын ноябрь айында Жалал-Абад облусунун Базар-Коргон районунун Коткор айылынын тургуну Зулфия Айдарова 2 жаштагы кызынын өмүрүн сактап калуу үчүн коомчулуктан жардам сурап жатканын жазган.

Зулфия Айдарова кызынын ден соолугу кескин начарлап, кан кусуп, кан аралаш заң чыгарып калганын айткан. Дарыгерлер эки ай аралыгында чет өлкөдө операция жасалбаса кеч болуп каларын эскертишкен.

«12 жыл күтүп, кыздуу болгонбуз. Кызымдын бул дартка чалдыкканына 1,5 жылдан өтүп калды. Кыргызстандын ичинде көрсөтпөгөн дарыгер калбады. Башында ар бир эки күндө кан куйдуруп турчубуз. Кийинчерээк бир айда бир жолу куйдура баштадык. Бирок кээде куйган кан кайра заарасы менен чыгып кетет. Ушул күнгө чейин 20 жолу кан куйдурдук. Анын ар бирине 10-15 миң сомдон жушадык. Жалал-Абаддан Ошко келген жол киребизге да бир топ акча сарпталат. Бул каражатты ай сайын табуу кыйын болуп жатат», - деген З.Айдарова.

Дарыгерлер Татына Айымга Индияда операция жасатууну сунушташкан. Каржы маселеси чечилсе анын 14 жаштагы агасы донор болууга даяр болчу.
Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×