Бөлүмдөр
Ишемби, 21-сентябрь
Жалал-Абад облусуБазар-Коргон району 16.08.2019 19:22

Базар-Коргондо баптисттик сыйынуу үйүнүн курулуп жатканына тургундар нааразы

Turmush -  Бүгүн, 16-августта Базар-Коргон районунун бийлик өкүлдөрү христианчылыктын баптист агымын тутунган адамдардын сыйынуучу үйүнүн курулуп жатканына нааразы болгон жергиликтүү тургундар менен жолукту. Бул тууралуу аймактык кабарчы билдирди.

Маалым болгондой, райондун Совет айылында христианчылыктын баптист агымын тутунган адамдар сыйынуучу үй тургузуу үчүн курулуш ишин башташкан. Бул ишке нааразы болгон тургундар бир аптадан бери тийиштүү тараптарга өз нааразычылыктарын айтып чыга башташкан.

Айыл тургуну Саламат Жолдошеванын айтымында, 30дай жашоочу райондун бийлигине арыз менен кайрылган.

«Негизи бул үйдү көп жыл мурун Таалай деген киши сатып алган, кийинчерээк ал үй-бүлөсү менен Россияга көчүп кетип, үйдү сатыкка койгон. Угушума караганда азыр келип жаткан адамдар үйдү 2 млн сомго сатып алып, тиешелүү тараптардан мейманкана курууга уруксат берүүчү документ алышыптыр. Акыркы 1,5 айдан бери курулуш иши жүрүүдө. Мен бул үйгө жакын жашайм. Күн сайын 20дан ашык адам келип, өздөрүнчө сыйынуу жөрөлгөлөрүн жасашат. Буга чейин айыл эли нааразы болгондо, алар баары мыйзам чегинде экенин жана документтери бар экенин айтышкан. Азыр дагы нааразы болуп жатабыз, бийлик чара көрбөсө айылдагы жаштар үйдү өрттөп салабыз дегенге чейин барып жатышат. Ушул маселени чечип беришсе жакшы болмок», - деди ал.

Тургундардын пикиринде, алар жергиликтүү бийликтин өкүлдөрүнө бул жайды жабуу талабы менен кайрылышкан. Жолугушуу учурунда дагы дал ушул маселени көтөрүштү.

Ал эми Базар-Коргон райондук администрациясы тургундардын атынан кайрылуу түшкөнүн, ал боюнча комиссия түзүлүп, териштирүү иштери жүргүзүлүп жатканын, 26-августка чейин элге жооп болорун билдиришти.

Дин иштери боюнча мамлекеттик комитеттин Жалал-Абад облусундагы өкүлү Нурбек Кайсарбаевдин айтымында, бул агым 1998-жылы каттоодон өткөн, бирок ал документтин негизинде Бишкек шаарынан тышкаркы аймактарга өкүлчүлүктөрүн ачып, ишмердүүлүгүн жүргүзүүгө мыйзам жооп бербейт.

«Башка райондордо ишмердүүлүгүн Бишкектеги 1998-жылдагы уставдын жана күбөлүктүн негизинде жүргүзүшөт. Ошол эле уставдын 4,2 жана 4,3-беренелерине ылайык, Бишкектен каттоодон өткөн уюмдар жергиликтүү жамааттын уюмун ача турган болсо, тийиштүү органдардан каттоодон өтүүсү керек. Башкача айтканда, Юстиция министрлигинен жана дин иштери боюнча мамлекеттик комиссиясынан каттоодон өтүп, филиал катары иштегенге укуктуу деп айтылган.

Жергиликтүү тургундар менен сүйлөшкөнүмдө алардын үйлөрүнө адамдар келип, үгүт-насаат иштерин жүргүзүп жатышыптыр. Эгер чын эле «Жахабанын күбөлөрү» агымынын мүчөлөрү ушундай кадамга бара турган болсо, тургундар акимге кайрылганга укуктуу», - деди Н.Кайсарбаев.

Ал эми «Жахабанын күбөлөрү» диний агымынын мүчөлөрү нааразы болгон тургундарга ишти мыйзамдын негизинде алып барып жатышкандыктарын айтышкан.

Аталган диний агымдын өкүлдөрүнөн пикир алууга мүмкүнчүлүк болгон жок.

Буга чейин эки жыл мурун Ала-Бука районунда христианчылыктын баптист агымын тутунган маркум аялдын сөөгү жергиликтүү тургундардын нааразычылыгы менен мүрзөдөн казып чыгарылып, акыры ээн талаага көмүлгөнү маалымдалган.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×