Бөлүмдөр
Бейшемби, 23-январь
Жалал-Абад облусуБазар-Коргон району 18.12.2019 08:49 На русском

«Соттолуп, каза болгон» жетекчи тирүү болуп чыкты: ИИМ эки К.Чойтоев болгонун билдирди

Каныбек Чойтоев
Каныбек Чойтоев

Turmush -  Ички иштер министрлиги Базар-Коргон районунун тургуну Каныбек Чойтоевге анын өлгөндүгү тууралуу аныктама берген эмес. Бул тууралуу ИИМдин басма сөз кызматы билдирди.

Алардын маалыматына караганда, 2018-жылы 7-июнда Жогорку Кеңештен келген суроо-талап боюнча ИИМдин Маалыматтык технологиялар башкы башкармалыгынын кызматкерлери тарабынан маалымат даярдалып, Жогорку Кеңешке жөнөтүлгөн. Аталган маалыматта ИИМдин Маалыматтык технологиялар башкы башкармалыгынын базасында 1960-жылы январь айында туулган Каныбек Чойтоев аттуу эки жаран бар экени кабарланган. 15-20 жыл мурда экөө тең мыйзам бузуу фактысына катыштыгы бар болгондугу үчүн аты-жөнү базага киргизилген. Анын бирөө Жалал-Абад облусунун тургуну болсо, экинчиси Чүй облусунун тургуну болгон.

Жалал-Абад облусунун тургуну К.Чойтоев Кылмыш-жаза кодексинин 171-беренеси менен (эски кодекс, ишенип берилген мүлктү ыйгарып алуу же төлөмөр болуу) шектелип, бирок кылмыш иши өндүрүштөн кыскартылып, соттун өкүмү менен кылмыш жоопкерчилигинен бошотулган. Тактап айтканда, соттолгон эмес. Ал эми Чүй облусунун тургуну К.Чойтоев 5 жолу уурулук, мал уурулук фактылары боюнча соттолуп, 19 жыл мурда түрмөдө каза болгон.

«2018-жылы 7-июнда Жогорку Кеңешке аталган 2 адам тууралуу толук маалымат жөнөтүлгөн. Бирок Жалал-Абад облусунун тургуну К.Чойтоев эмне себептен өзү тууралуу маалыматтарды айтпастан, Чүй облусунун тургуну К.Чойтоев тууралуу маалыматтарды айтканы белгисиз. Жалал-Абад облусунун тургуну Каныбек Чойтоев айтып жаткан корутундуга министр Кашкар Жунушалиев эмес, анын биринчи орун басары Сүйүн Өмүрзаков кол койгон. Учурда ИИМдин ички иликтөө кызматы тарабынан К.Чойтоевдердин туулган күнү жана атасынын ысымдары техникалык жактан ката жазылып калышы боюнча Маалыматтык технологиялар башкы башкармалыгынын кызматкерлеринин үстүнөн кызматтык иликтөө жүрүп жатат. Тиешелүү кызматкерлердин жоопкерчилиги каралат», - деп айтылат ИИМдин маалыматында.

-----------------------------------------

Буга чейин Turmush басылмасы Базар-Коргон районуна караштуу Кызыл-Үңкүр айыл өкмөтүнүн тургуну Каныбек Чойтоев ИИМдин корутундусунда ал тууралуу эки жолу соттолуп, каза болгондугу жазылганын билдирген. Ал ИИМдин корутундусундагы маалыматты четке кагып, тирүү экенин айткан.

16-декабрда Кызыл-Үңкүр токой чарбасынын жетекчиси болуп дайындалган Каныбек Чойтоевди райондун акими Айбек Бегимкулов эмгек жамаатка тааныштыруу үчүн алып барганда, жаңы жетекчинин келгенине нааразы болгон тургундар топтолушкан. Анда чогулгандар К.Чойтоевди эки жолу соттолуп чыкканын билдиришкен. Ал эми К.Чойтоев журналисттердин суроолоруна жооп берип жатып, анын соттолгону жалган экенин айткан

«ИИМдин корутундусунда мени Кеминде эки жолу уурулук кылып соттолгон, каза болгон деп жүрөт. Мен тирүүмүн. Корутундуга министр Кашкар Жунушалиевдин колу коюлуптур. Мен бир чети адашып калыштыбы деп ойлондум. Бирок туулган жылым, айым, күнүмө чейин туура чыгып жатат», - деген К.Чойтоев.

Буга чейин Кызыл-Үңкүр токой чарбасынын жетекчиси болуп дайындалган Каныбек Чойтоевдин кызматка келишине каршы болгон айылдаштары аны ишканага киргизбей коюшканы маалымдалган.

Толук маалымат бул шилтемеде.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×